SA BAVARCIMA NEMA ŠALE
Bajern bez primljenog gola izbacio PSŽ iz LŠ
Fudbaleri Bajern Minhena i u drugoj utakmici osmine finala Lige šampiona bili su uspješniji od prvaka Francuske PSŽ ovoga puta sa 2:0, i tako zasluženo prošli u narednu rundu takmičenja. Strijelci za Bavarce bili su Čupomoting u 61. i Serž Gnabri u 89. minuti.
Pari Sen Žermen su tako iz Lige šampiona sa po jednim golom izbacila dva nekadašnja igrača – u prvom meču je strijelac bio Kingsli Koman, u drugom Čupo-Moting. Da sve bude još zanimljivije – pet od šest posljednjih golova Bajerna protiv PSŽ postigli su upravo njih dvojica.
Pari Sen Žermen je priprijetio nakon svega 120 sekundi. Sjajnu priliku propustio je Kilijan Mbape.
Nizali su se napadi na obe strane. Poslije 20 minuta igre ponovo je Mbape probao, ali je lopta otišla pored gola domaćih.
A onda, nakon pola sata igre prva prava prijetnja domaćih. Musijala je sjajno izgradio prostor, šutirao odlično, ali je odlično odbranio Donaruma.
Gosti su morali da mijenjaju zbog povrede nakon 36. minuta. Markinjos nije mogao da nastavi utakmicu, a Galtije je na njegovo mjesto ubacio Mukelea.
Desetak minuta prije kraja prvog poluvremena u sjajnoj prilici da Parižane vrati u igru u ovom dvomeču imao je i Vitinja, ali je njegov udarac sjajno blokiran od strane De Lihta koji je loptu izbacio sa gol crte.
Nova uzbuđenja vidjeli smo u 51. minutu. Danijele Orsato je nakon intervencije iz VAR sobe provjeravao da li ima osnova da dosudi penal za Bajern, ali kaznenog udarca nije bilo.
Ni minut nije prošao, Erik Maksim Čupo-Moting je glavom poslao loptu u mrežu. I opet VAR koji je zbog faula poništio gol domaćina.
Bajern je na kraju dočekao povod za slavlje pred 75.000 navijača. Nakon velike greške odbrane Pari Sen Žermena, Čupo-Moting je došao do lopte i poslao je u mrežu. Ovoga puta sve je bilo čisto.
Sve je i konačno riješeno u samom finišu kada je za 2:0 pogodio Serž Gnabri u 89. minutu.
Donaruma je sjajno odbranio u drugom minutu nadoknade nakon pokušaja Alfonsa Dejvisa, a u četvrtom minutu je gol Sadija Manea poništen zbog ofsajda.
Izvor fotografije: EPA