GDJE SU NESTALI NEKADAŠNJI KULTNI ŠPANSKI KLUBOVI
Većine ovih timova sjećate se iz boljih vremena
Španski kup će biti na programu u utorak, srijedu i četvrtak, uključuju se prvoligaši, a bogat program je prilika da se podsjetimo nekih timova koji su svojevremeno bili u Primeri, a sada su nestali sa mape.
Recimo, ako odemo u Soriju, tamo nas čeka Numansija, klub koji je igrao u Primeri prije 20-tak godina, uspio da preživi par sezona i predstavljao uvijek kamen u cipeli za Barselonu. Oni su ispadali i vraćali su se 2008. ali nisu preživjeli, vodio ih je Sergije Krešić, on je smijenjen, Paketa je bio čuvar klupe, ali su “Numantinosi” ispali, prošlu deceniju uglavnom proveli u Segundi, pa čak ispali i u četvrtu ligu, da bi se prošlog vijeka vratili. Ovaj tim iz pokrajine Kastilja i Leon, klub nosi staro keltsko ime grada, a “Numantinosi” su herojski stanovnici naselja koje je izdržalo opsadu Rimljana punih 20 godina. Kada se sve sabere, proveli su četiri godine u Primeri, u sezoni kada su posljednji put ispali, srušili su, vjerovali ili ne, na startu Barselonu, Mario je postigao taj istorijski gol, te sezone su Katalonci osvojili triplu krunu.
Numansija će u srijedu ugostiti Hihon, klub koji su eliminisali kao drugoligaši u sjajnoj 1996. Naime, tada je ovaj klub tukao Santander, Sosijedad i Hihon i onda su izgubili sa 3:1 od Barselone za koju je igrao Pep, poveli su, ali je Krojfov tim otišao dalje.
Prisjetimo se i Alkorkona koji bi mogao da iznenadi Kartahenu u utorak uveče. U pitanju je klub iz južnog Madrida, osnovan prije oko pola vijeka. U prvih trideset godina su igrali u lokalnim ligama, ali su početkom vijeka stigli u treću. Šokirali su svijet kada su 2009. godine rasturili Real Madrid. Bilo je 4:0 pred 4000 ljudi koliko prima njihov stadion, u revanšu je Real pobijedio samo sa 1:0, pa je David nokautirao “Galaktikose”, onu drugu verziju, za koju su igrali Ronaldo, Kaka, Guti, Benzema, Van Nistelroj. Ovaj poraz Reala nazvan je “Alkorkonaco” (naravno, radi se aluziji na Marakanaco iz 1950. godine). Mediji su se utrkivali u senzacionalnim informacijama tipa da je prosječna godišnja plata fudbalera trećeligaša manje od onoga što Ronaldo zaradi za jedan dan.
Alkorkon je sljedeće godine ušao u Segundu, proveo više od decenije i onda su prošlog ljeta ispali u četvrtfinalu, izbacili su Hetafe, Elče, Espanjol, Kordobu, na kraju ih je zaustavio Alaveš.
Prisjetimo se i Logronjesa koji čeka Albasete. La Rioha je region koji je mnogo poznatiji po vinu nego fudbalu, klub iz Logronja je osnovan 1940. poslije građanskog rata, deceniju kasnije ušao je i u drugu ligu i do sredine bio negdje između drugog i trećeg ranga. Onda su 1987. posljednjeg dana sezone slavili protiv Valensije koja je bila prva i ušli u elitu. Uslijedili je devet velikih sezona u eliti, oni su devedesetih bili baš etablirani u Primeri, a onda je uslijedio strmoglav pad u četvrtu ligu, protesti igrač zbog neisplaćenih zarada i gašenje 2009. Osnovali su novi klub, dočepali se prije dvije sezone Segunde, ali odmah ispali. Prošle sezone su igrali u plej ofu, nisu uspjeli. Prije četiri godine tukli su Kadiz u ovoj rundi, ispali tijesno od Valensije. Nisu bez šansi protiv Albasetea.
O Meridi smo pisali, dolaze iz istoimenog grada u Ekstremaduri, zovu ih “Rimljani” jer su oni i osnovali ovaj grad. Ako nekoga nanese put, to je grad sa najviše rimskih spomenika u Španiji. Lokalni ligaš se raspao 2000. godine, dvije sezone su čak igrali u Primeri, a i drugi pokušaj stvaranja novog kluba je propao 2013. Negdje su između treće i četvrte lige, sada su trećoj, ušli su ljetos. Prije četiri godine prošli su prvo kolo, na ovom stepeniku ih je pregazila Selta. Sada igraju sa Alavešom i teško mogu da iznenade jedan od najboljih timova Segunde.
Titulu brani Betis koji je u finalu dobio Valensiju, u ovoj rundi još nema Barselone, Reala, kao i finalista iz prošle sezone. Najkrupnije ime je Atletiko Madrid koji gostuje kod četvrtoligaša Arenteira u Galiciji, dok će Viljareal putovati u provinciju Salamanke, čeka ih nepoznati Hujelo, tim koji je promovisan ljetos iz pete lige.
Vidjećemo i dva duela ekipa iz Segunde, Ovijedo poslije asturijskog derbija čeka Granadu, dok će Levante u Valensiji biti domaćin Andori.
Izvor fotografije: insidespanishfootball.com