JUNAJTED OPRAVDAO ULOGU FAVORITA
Megvajer umalo opet tragičar
Fudbaleri Mančester junajteda savladali su kao gosti ekipu Notingem Foresta rezultatom 2:0 u okviru 31. kola engleske Premijer lige.
Prvi put poslije dužeg vremena u startnoj postavi gostiju našao se i osporavani Hari Megvajer, a upravo je on učestvovao u situaciji koja tek pukom srećom nije rezultovala penalom za protivnika.
Prijetili su “šumari” preko Mekene čiji je udarac zakačio stativu, ali kazna za promašaj uslijedila je u 32. minutu kada je Antoni pokupio odbijenu loptu poslije šuta Marsijala i sproveo je u mrežu.
Početkom drugog poluvremena, priliku je propustio i Fernandeš koji je pogodio prečku, međutim spasa za domaćina nije bilo u 76. minutu.
Antoni je promiješao odbranu Notingema, pravovremeno uposlio Dijega Dalota koji je hladnokrvno završio akciju golom.
Do kraja meča nije bilo većih uzbuđenja, pa je Mančester junajted tako osvojio svoj 59. bod i nalazi se na trećoj poziciji iskoristivši poraz Njukasla.
Notingem je 18. sa 27 bodova.
Izvor fotografije: Profimedia