KONTE NEZADOVOLJAN, UGOVOR SE BLIŽI KRAJU
Šta ga može zadržati u Londonu?
Totenhem je ušao u lošu seriju rezultata.
“Pijevci” imaju dva poraza u tri kola, posebno je bolan ovaj najskoriji od Arsenala na domaćem terenu (0:2) u derbiju sjevernog Londona. “Pijevci” su ispali i iz Karabao kupa, čeka ih sudar 4. runde FA kupa sa Prestonom a već sutra gostuju na “Etihadu”. Već sada, na polovini sezone, imaju deficit od pet bodova u trci za mjestom brojem četiri koje drži Junajted sa utakmicom manje.
Konte je ljut zato što je dobar dio januara prošao a tim se nije pojačao. Jasno imali su intenzivno ljeto gdje su stigli igrači poput Rišarlisona, Bisume, Perišića, ozvaničeni su i transferi Udogea i Romera, ali boljitka nema. Engleski mediji pišu i o Konteovom ugovoru.
Znamo da Italijanu nije strano da ode ukoliko ne naiđe na podršku od vlasnika, Englezi pak pišu da bivši trener Čelzija, Intera i Juventusa želi veliku povišicu za ostanak u Londonu.
Konte zarađuje oko 15 miliona funti na godišnjem nivou, ugovor mu ističe krajem juna ove godine. Jasno da bi “pijevci” voljeli što prije da srede situaciju sa “misterom”, dodatno odugovlačenje bi moglo poremetiti atmosferu.
Izvor fotografije: EPA