OSTIN RIVS ZADIVIO LEBRONA
Velika pobjeda Lejkersa, Klipersi trijumfovali u Portlandu
U noći između nedjelje i ponedjeljka, odigrana su četiri NBA meča, u centru pažnje bili su Los Anđeles Lejkersi u pobjedi nad Orlandom sa 111:105.
Ostin Rivs je iznenada postao “zvijezda večeri” sa čak 35 poena, od toga – 16/18 imao je sa linije penala. Šutirao je 9/14 iz igre, imao je još šest skokova i šest asistencija, a mnogi su se zapitali da li bi i Lebron Džejms ili Entoni Dejvis dobili ovoliko slobodnih bacanja.
U svakom slučaju, samog Lebrona nije bilo, ali se na mrežama u transu oglasio i pozdravio rekord karijere ovog momka, dok je Dejvis imao 15 poena i 11 skokova. Bankero i Vagner bili su lideri Orlanda sa po 21 poenom, Rasel je bio adut Lejkersa sa 18 poena, Braun je imao 12. Vodili su Lejkersi tokom cijele posljednje dionice, u jednom trenutku je Orlando priprijetio i izjednačio, ali je domaći tim ipak napravio mini seriju za odstupnicu i sigurnu pobjedu.
Ujedno, Lejkersi su se održali u žestokoj borbi da prate timove koji su u zoni doigravanja za plej-of.
Drugi tim iz Los Anđelesa, Klipersi, trijumfovao je u Portlandu uz 29 poena Džordža i 24 Lenarda. Jusuf Nurkić je branio čast Blejzersa dabl-dablom sa 23 poena i 11 skokova, Lilard je imao 21 poen, devet asistencija i sedam skokova – nedovoljno da se prekine crni niz, Blejzersi su vezali čak šesti poraz. U posljednjih 11 mečeva, imaju čak devet poraza i teško da će odmaći od 13. mjesta Zapada.
Milvoki se nije igrao sa reputacijom protiv Toronta, Lopez je imao 26 poena, a Adetokumbo tripl dabl sa 22 poenaa, 13 skokova i 10 asistencija. Imao je Janis 9/9 iz igre, anulirana je i partija VanVlita sa 23 poena i 11 asistencija na drugoj strani. Pelikansi su trijumfalno otišli iz Hjustona uz po 26 poena Ingrama i Mekoluma, mala utjeha Grinu biće partija od 40 poena u domaćem timu.
Izvor fotografije: ddp USA